Gipadayag sa depensa ni Vice President Sara Duterte atol sa ikatulong adlaw sa impeachment trial kagahapong adlawa Hulyo 9, 2026 nga ang giingong mga pahayag nga giisip pagpanghulga batok kang Pangulong Ferdinand Marcos Jr. resulta sa pag-aresto sa iyang chief of staff nga si Zuleika Lopez.
Matud sa depensa, dako ang epekto sa Bise Presidente sa pagdetine kang Lopez sa House of Representatives human kini ma-contempt sa imbestigasyon nga adunay kalabotan sa confidential funds sa Office of the Vice President. Gipakita usab sa kampo ni Duterte ang video nga nagpakita kang Lopez nga naghilak ug misupak sa plano nga ibalhin siya sa Women’s Correctional Facility samtang anaa sa kustodiya sa House of Representatives. Giklaro sa depensa nga wala nila giingong husto ang giingong mga pagpanghulga, kondili ilang gipatin-aw lamang ang sitwasyon nga maoy gigikanan niini.
Gipahimangnoan usab ni Senate President Francis “Chiz” Escudero ang mga senator-judges nga likayan ang pagpangutana og mga pangutana nga mahimong mag-aghat sa mga abogado sa paghatag og legal nga konklusyon. Padayon nga gidungog sa impeachment court ang Article IV sa impeachment complaint batok kang Vice President Sara Duterte, nga naghisgot sa giingong grave threats ug alegasyon sa plano umanong pagdaot kang Pangulong Ferdinand Marcos Jr., First Lady Liza Araneta-Marcos, ug kanhing House Speaker Martin Romualdez.
