Gipasabot ni Impeachment Trial Presiding Officer Francis Escudero nga dili obligado si Vice President Sara Duterte nga personal nga motambong sa iyang impeachment trial tungod kay girepresentahan na siya sa iyang mga abogado.
Sumala ni Escudero, walay lagda sa impeachment court nga nag-obliga sa respondent nga motambong sa mga pagdungog kon dili niya kini gusto.
Matod pa niya, sanglit aduna nay abogado si Duterte nga maoy nagdumala sa iyang depensa, anaa na kaniya ang desisyon kung gusto ba siyang motambong sa mga pagdungog sa impeachment court.
Gipahayag usab ni Escudero nga kon gusto sa House prosecution nga ipatawag si Duterte aron motestigo, mahimo silang mosumite og pormal nga mosyon o hangyo ngadto sa impeachment court. Ang maong hangyo pagahukman pa sa mga senador nga naglingkod isip impeachment judges.
Gihimo ni Escudero ang maong pagpatin-aw human mangutana si counsel for the prosecution Atty. Lorna Kapunan sa ikaduhang adlaw sa impeachment trial niadtong Martes kon motambong ba ang bise presidente, human kini namatikdan sulod sa pasilidad sa Senado.
