Gipasiguro ni Pangulong Ferdinand Marcos Jr. nga kinahanglan magpabiling lig-on ug makanunayon ang baruganan sa Pilipinas sa pagpatuman sa 2016 Arbitral Award sa West Philippine Sea, tungod kay usa kini sa labing importante nga isyu nga giatubang sa nasod.
Sumala pa sa Pangulo, iyang gikabalak-an nga mahimong mausab ang polisiya sa umaabot nga administrasyon human siya mobiya sa katungdanan, ilabina sa pagpanalipod sa arbitral ruling ug sa soberanong katungod sa Pilipinas sa West Philippine Sea.
Dugang pa niini, gipasiugda ni Marcos nga ang maong isyu dili lamang may kalabotan sa ordinaryong mga Pilipino kondili sa integridad ug kaugmaon sa Republika sa Pilipinas, busa kinahanglan magpabiling makanunayon ang gobyerno sa pagpanalipod sa interes sa nasod.
Lakip sa iyang gipasiugda, giingon sa Pangulo nga ang suporta sa Canada ug sa ubang mga nasod sa 2016 Arbitral Award nagpamatuod nga ang baruganan sa Pilipinas nakabase sa internasyonal nga balaod, pagpanalipod sa teritoryal nga integridad, ug pagpatuman sa soberanong katungod sa nasod.
Sa kasamtangan, giingon usab ni Marcos nga alang kaniya, halos walay laing isyu nga mas bug-at pa kay sa pagpanalipod sa West Philippine Sea, ug kini usa sa labing dakong responsibilidad nga giatubang sa bisan kinsang Presidente sa Pilipinas.
