Giduso ni Leyte Representative Ferdinand Martin G. Romualdez ang pagtukod sa usa ka regional rapid-response network nga pagalakipan sa mga mental health ug child protection professionals. Gihimo ni Romualdez ang maong sugyot human sa pagpamusil sa San Jose National High School sa Tacloban City, nga misangpot sa kamatayon sa tulo ka estudyante ug pagkaangol sa pipila pa.
Matud pa sa kongresista, ang maong network gitumong aron mapalig-on ang dali nga pagresponde ug paghatag og angay nga suporta sa mga kabatan-onang naapektuhan sa mga insidente sa kapintasan ug uban pang krisis. Sa laing bahin, mipabor usab ang kanhing house speaker sa pagrepaso sa mga polisiya alang sa luwas nga paggamit sa social media alang sa mga menor de edad.
Matud pa niini responsibilidad sa tibuok panggamhanan, mga tulunghaan, ginikanan, komunidad ug matag Pilipino ang pagsiguro sa kaluwasan sa mga kabatan-onan. Dugang pa niya, dili na angay hulaton pa ang laing trahedya ayha pa matul-id ang mga kakulangan sa school safety, mental health support ug child protection.
