Gimando sa Department of the Interior and Local Government (DILG) ang hugot nga pagpatuman sa maximum tolerance ug ang angay nga security deployment atol sa rally sa Iglesia ni Cristo (INC) sa dapit sa EDSA.
Sumala pa sa DILG, gimandoan ang Philippine National Police (PNP), sa pakigtambayayong sa mga lokal nga panggamhanan, nga masiguro nga malinawon, hapsay, ug luwas ang maong kalihokan alang sa tanang mga partisipante ug sa publiko.
Dugang pa niini, giawhag sa DILG ang tanang mitambong sa rally nga gamiton ang ilang katungod sa responsable nga paagi, subay sa balaod, ug magpadayon sa pakigkoordinar sa mga otoridad sa tibuok gidugayon sa kalihokan.
Sa kasamtangan, gipasig-uli usab sa ahensya ang ilang pagtahod sa konstitusyonal nga katungod sa matag indibidwal sa malinawon nga panagtigom ug gawasnong pagpahayag sa ilang mga opinyon ug baruganan.
