Nasuta nga naligo sa ilang kaugalingong dugo ug wala na’y kinabuhi ang upat ka miyembro sa usa ka pamilya sulod sa ilang panimalay sa Purok 5, Barangay Litapan, Josefina, Zamboanga del Sur. Sumala pa sa inisyal nga imbestigasyon, giila ang mga biktima nga sila Dodong Arnel, 12 anyos, nga nakit-an pa nga nag-akbo sa lamesa samtang nagtuon; iyang mga igsoon nga sila En-En, 15 anyos, ug Nassel, 17 anyos; ug ang ilang inahan nga si Arlyn Dumalte, usa ka aktibong Barangay Health Worker sa maong barangay.
Dugang pa niini, sumala kang Police Lt. Julito Pamalaran, hepe sa Josefina Municipal Police Station, gituohang gipangtigbas ang mga biktima ug posible nga nahitabo ang krimen kaganihang buntag, hunyo 29, 2026. Lakip sa gitan-aw nga hinungdan sa ulahing pagkahibalo sa insidente mao ang kahilit sa maong lugar ug kalay-on niini sa ubang mga panimalay.
Sa kasamtangan, adunay na’y person of interest ang kapulisan, samtang nagpadayon ang lawom nga imbestigasyon aron matino ang motibo ug mailhan ang responsable sa maong makalilisang nga krimen.Sa pagkakaron, hugot ang koordinasyon sa kapulisan ug ubang mga ahensya aron mapadali ang pagsulbad sa maong kaso.
