Nanawagan si Pangulong Ferdinand Marcos Jr. og hiniusang aksyon aron mapanalipdan ang mga kabatan-onan batok sa pagpanakit, pagpabaya ug uban pang mga hulga, human sa nagkasunod nga mga trahedya nga nahitabo sa pipila ka mga tulunghaan sa nasud.
Sumala pa, gibutyag sa Pangulo nga ang mga tulunghaan kinahanglan magpabiling luwas nga dapit alang sa pagkat-on, pagtukod sa mga damgo ug paglambo sa mga estudyante, ug dili mahimong hinungdan sa kabalaka sa mga ginikanan alang sa kaluwasan sa ilang mga anak. Dugang pa niini, gimandoan ni Marcos ang mga ahensya sa edukasyon, kapulisan, panglawas ug mga lokal nga panggamhanan nga dugangang palig-onon ang mga programa ug lakang aron masiguro ang kaluwasan sa mga estudyante sa tibuok nasud.
Lakip sa iyang gihangyo, giawhag usab sa Punong Ehekutibo ang mga ginikanan nga maghatag og dugang nga panahon, pagtagad ug pagsabot sa ilang mga anak, nga matud pa maoy sinugdanan sa tinuod nga pagpanalipod. Sa kasamtangan, gibutyag usab ni Pangulong Marcos nga ang pagpangayo og tabang dili timaan sa kahuyang, kondili usa ka lakang aron mapanalipdan ang kaugalingon ug ang uban.
