Nanawagan si Senate President Sherwin Gatchalian sa mga ginikanan ug lokal nga panggamhanan nga mas aktibong motambayayong sa pagpugong sa nagkadakong mga bayolenting insidente sulod sa mga eskwelahan pinaagi sa mas hugot nga pagpatuman sa Parent Effectiveness Service o PES Program. Gihimo ni Senate President Gatchalian ang maong panawagan kasunod sa pagpamusil sulod sa usa ka tulunghaan sa Tacloban City nga nalambigit ang mga menor de edad. Sumala pa, misaka na sa upat ang namatay samtang 15 pa ang padayon nga ginatambalan human sa maong insidente.
Gipadayag sa Senate President ang kabalaka kon giunsa sa mga menor de edad ang pag-angkon og mga armas ug nganong nakakat-on sila sa paggamit niini bisan menor de edad pa sila. Matud pa kaniya, importante nga mapalig-on ang papel sa pamilya sa paggiya ug paghulma sa pamatasan sa mga kabataan aron malikayan ang dugang pang mga insidente sa bayolente sulod ug gawas sa eskwelahan. Lakip sa gibutyag ni Senate President Gatchalian ang Parent Effectiveness Service Program nga gitukod ubos sa Republic Act No. 11908 o Parent Effectiveness Service Program Act, nga siya usab ang nagsulat.
Tumong niini nga mapalambo ang kahibalo ug abilidad sa mga ginikanan ug parent-substitutes sa pag-atiman ug pagpanalipod sa katungod sa mga bata.Dugang pa niini, gimando sa maong balaod ang tanang siyudad ug mga lungsod sa pagpatuman sa programa, samtang gitahasan ang Department of Social Welfare and Development sa paghimo og learning modules nga nagtutok sa child protection ug pagpalambo sa positibong kinaiya sa mga kabatan-onan.
Dugang pa, gikanayon usab ni Senate President Gatchalian nga dili lamang seguridad sulod sa mga eskwelahan ang angay tutokan, kondili lakip usab ang paggiya ug pagmonitor sa mga ginikanan sa ilang mga anak sulod sa panimalay.
Sa pagkakaron, padayon ang mga panawagan alang sa mas lig-on nga kooperasyon tali sa mga ginikanan, mga tulunghaan ug lokal nga panggamhanan aron masulbad ang nagkadakong problema sa bayolente nga nalambigit sa mga estudyante sa nagkadaiyang bahin sa nasud.
