Gipunting sa House prosecution panel ang pagpresentar og lig-on ug masaligan nga ebidensya batok kang VP Sara Duterte imbes nga magpokus sa gidaghanon sa mga boto nga gikinahanglan sa impeachment trial.
Kini ang gipadayag ni Akbayan Party-list Rep. Chel Diokno nga usa sa mga prosecutors sa impeachment case batok sa Bise Presidente.
Sumala pa ni Diokno, dili prayoridad sa prosecution panel ang mga espekulasyon may kalabotan sa ihap sa mga boto nga gikinahanglan aron makab-ot ang desisyon sa impeachment court.
Dugang pa niini, ang ilang gitutokan sa pagkakaron mao ang hapsay nga paglatid sa mga ebidensya ngadto sa Senado aron mapakita ug mapamatud-an ang mga alegasyon batok sa ikaduhang labing taas nga opisyal sa nasud.
Subay sa pahayag ni Diokno, wala usab maapektohi sa maong mga isyu ang pagpangandam sa prosecution team alang sa impeachment trial nga gitakdang magsugod sa Hulyo 6.
Lakip sa ilang giandam ang mga testigo, dokumento ug legal nga mga argumento aron suportahan ang upat ka Articles of Impeachment nga gisang-at batok kang VP Sara Duterte.
Lakip sa mga alegasyon ang giingong sayop nga paggamit sa confidential funds, dili matubag nga katigayunan, panuhol ug mga hulga batok sa mga hataas nga opisyal sa gobyerno.
Sa pagkakaron, nagpadayon ang pagpangandam sa duha ka kampo alang sa umaabot nga impeachment trial sa Senado.
