Gipadayag ni retired Supreme Court Associate Justice Adolfo Azcuna nga mahimong igo na ang 15 ka boto sa mga senador nga molingkod isip hukom aron mapamatud-ang sad-an si VP Sara Duterte sa impeachment trial kon ikonsiderar nga pugante si Sen. Ronald ‘Bato’ dela Rosa.
Sumala pa ni Azcuna, ubos sa Konstitusyon gikinahanglan ang two-thirds nga boto o 16 ka boto aron mapamatud-ang sad-an ang usa ka opisyal sa impeachment proceedings. Hinuon, mahimo matud pa maapektuhan kini kon adunay senador nga dili na malakip sa opisyal nga ihap sa mga miyembro sa Senado.
Dugang pa niini, gipasabot sa kanhing mahistrado nga mahimong dili na maapil sa ihap si Sen. Dela Rosa kon ideklarar kini nga pugante, nga iyang gitandi sa gitawag nga “constructive resignation.” Sa pagkakaron, wala pa magpakita sa publiko si Sen. Dela Rosa human sa giisyu nga warrant of arrest sa International Criminal Court (ICC) batok kaniya.
Kahinumduman nga gilakip ang ngalan ni Sen. Dela Rosa isip usa sa giingong kauban ni kanhing Pangulong Rodrigo Duterte sa kaso sa crimes against humanity nga may kalabotan sa kampanya kontra ilegal nga droga, alegasyon nga ilang gipanghimakak.
