Giangkon ni Senate President Sherwin Gatchalian nga usa sa labing dako nga hagit sa pagpangandam alang sa impeachment trial ni Vice President Sara Duterte mao ang logistics gumikan sa limitadong espasyo sumala pa sa Senado. Sumala pa kang Gatchalian, gamay lamang ang building sa senado ug susama nga mihangyo ang House prosecution panel ug ang defense team nga magbaton og tagsa-tagsa nga kaugalingon nila nga holding o huddle room, media room ug kuwarto alang sa mga staff ingon man ang mga panginahanglan sa mga senador isip hukom sa pagtaral.
Tungod niini, gilauman sumala pa nga mamahimong guot ug limitado lamang ang paglihok sa mga tawo atol sa himuon nga pagtaral sa bise Presidente. Gipunto usab sa Senate President ang panginahanglan sa pagtutok sa seguridad ilabi na nga mamahimong abri kini sa publiko. Dungag pa niini, gikanayon ni Gatchalian nga una na silang nakig-tigom sa Armed Forces of the Philippines (AFP), Philippine National Police (PNP), Bureau of Fire Protection (BFP), Metropolitan Manila Development Authority (MMDA), National Intelligence Coordinating Agency (NICA) ingon man sa lokal nga kagamhanan sa Pasay City aron seguraduhon nga andam ang tanan alang sa impeachment proceedings.
Gawas niini, gitin-aw usab niini nga aduna nay kapin 20 ka mga miembro sa Philippine Marines nga naka deploy sa Senado hinungdan nga mahinungdanon ang koordinasyon sa tanan nga nalambigit nga ahensya. Samtang, wala pa usay klaro kung pila ang magasto nga pondo sa Impeachment trial sa bise presidente, hinuon, gipasalig ni Gatchalian nga mamahimong minimal lamang kini gumikan kay sa senado lamang kini ipahigayon. Bugtong ang madugang lamang sa galastuhan mao ang dugang seguridad aron masiguro nga luwas ang proseso sa pagtaral sa besi presidente.
