Miabot na sa 14 ka lokal nga panggamhanan ang nagdeklara og state of calamity human sa kusog nga Magnitude 7.8 nga linog nga miigo sa Mindanao niadtong Hunyo 8.
Sumala sa Office of Civil Defense (OCD), lakip sa mga apektadong lugar ang pipila ka lungsod sa Davao Occidental, Sarangani, ug South Cotabato.
Tungod sa deklarasyon sa state of calamity, mas mapaspasan ang pagpalit sa mga lokal nga panggamhanan og relief goods ug uban pang mga kinahanglanon alang sa dali nga pagtabang ug pagbangon sa mga naapektuhang residente.
Gipasabot usab sa OCD nga gipatuman na ang price freeze sa mga batakang palaliton sa mga apektadong lugar aron malikayan ang pagsaka sa presyo samtang nag-atubang pa sa krisis ang mga residente.
Base sa katapusang datos sa National Disaster Risk Reduction and Management Council (NDRRMC), kapin sa 176,000 ka pamilya o sobra sa 736,000 ka indibidwal ang naapektuhan sa linog.
Miabot na usab sa 65 ang natala nga namatay, samtang kapin sa 57,000 ka mga balay ang nadaot diin labaw sa 10,000 ang hingpit nga naguba.
Giila sa OCD nga dakong hagit karon ang dali nga pagtukod pag-usab sa mga nagubang balay ug ang pagtino kung luwas pa bang puy-an ang mga kanhing komunidad sa mga apektadong pamilya.
Sumala sa ahensya, nakigtambayayong sila sa Mines and Geosciences Bureau aron masuta kung kinahanglan bang balhinon ang pipila ka mga residente ngadto sa mas luwas nga lugar.
