Nadiskubre sa mga eksperto ang presensya sa radioactive isotopes sama sa Uranium-238, Thorium-228, ug Thorium-232 sa mga imported scrap metals nga gigamit sa Philippine Sanjia Steel Corporation sa paggama og steel rebars sa ilang planta sa Barangay Baluarte, Tagoloan, Misamis Oriental.
Sumala sa researcher sa Philippine Nuclear Research Institute nga si Teresa Salabit, nakita nila ang Thorium ug Uranium sa mga pundok sa scrap metal nga gituohang gi-import gikan sa China aron gamiton sa produksyon sa steel rebars.
Gipahayag usab niini nga nakita ang mga lama sa radioactive materials sa tibuok manufacturing process ug sa minilyon ka mga nahuman nga steel bars sulod sa 27-hectare nga pasilidad sa Sanjia.
Sumala pa niya, duha ka susamang pabrika sa Bulacan ug Pampanga ang una nang gipasirado human nadiskubre usab ang hazardous radioactive isotopes sa ilang production lines.
Mipahibalo usab ang Bureau of Philippine Standards nga gawas sa hazardous materials, nadiskubrihan usab nila nga substandard ug “structurally risky” ang mga rebars ug steel products sa maong pasilidad.
Samtang sa laing bahin, gilimod sa abogado ug spokesperson sa Sanjia nga si Atty. Julia Chu ang alegasyon nga ang kompanya naggamit og kontaminadong nuclear waste gikan sa China, ug giingon nga certified gikan sa Japan ang ilang raw materials.
Sumala pa nga ang planta kaniadto gipanag-iyahan ni Tony Yang, igsoon ni Michael Yang, nga giingong nalambigit sa illegal drug operations ug kanhing economic adviser sa administrasyon ni kanhing Pang. Rodrigo Duterte.
Sa karon si Tony Yang anaa sa Cagayan de Oro City Jail sa Barangay Lumbia tungod sa giingong falsification of public documents.
Tungod sa nadiskubreng radioactive isotopes, gikansela sa Department of Environment and Natural Resources ang Environmental Compliance Certificate sa kompanya ug nagpagula og cease-and-desist order nga nagpasirado sa smelting plant.
Sumala ni DENR Assistant Secretary Norlito Eneran, mapaundang ang operasyon sa kompanya pinaagi sa maong order ug gipamultahan usab kini og ₱450,000 tungod sa administrative violations.
Ang Department of Health Region 10 magpahigayon og medical check-up sa kapin 300 ka empleyado aron masuta kung naapektuhan ba sila sa hazardous materials.
Sumala pa ni Defense Secretary Gilbert Teodoro, daghan sa mga local workers ang nagtrabaho nga walay radiation protective gear ug wala makabalo sa delikadong kahimtang sa ilang palibot.
