Wala mitungha ang napulog-walo (18) ka mga kanhing miyembro sa Philippine Marines karong adlawa, Hunyo 8, sa pagdungog sa Senate Blue Ribbon Committee ubos sa bag-ong chairmanship ni Senador Erwin Tulfo, human sa reorganisasyon sa Senado.
Sumala sa Committee Secretary (ComSec), giimbitahan ang mga kanhing sundalo apan walay nadawat nga tubag ang Senado gikan kanila o sa ilahang abogado nga si Atty. Levito Baligod.
Wala usab mitambong si kanhing Congressman Mike Defensor, nga sumala sa ComSec wala man nalakip sa mga giimbitahan. Matud sa report sa miaging pagdungog niadtong Hunyo 4, gibutyag nga si Defensor daw nagbayad sumala pa o nag-suhol sa 18 ka ex-Marines aron motestigo sa isyu sa flood control anomaly, usa ka alegasyon nga iyang gikontra gilayon.
Wala usab mitungha ang pipila ka mga magbabalaod lakip sila si kanhing House Speaker Martin Romualdez, Rep. Zia Alonto Adiong, Rep. Jose Alvarez, Rep. Julienne Baronda, ug Rep. Leila de Lima.
Sa usa ka sulat gikan sa House Secretary-General Cheloy Velicaria-Garafil, gikanayon nga ang Ubos balay balauranan nagsunod sa “parliamentary courtesy” maong wala sila nitambong.
Bisan paman niini, nagpadayon gihapon ang pagdungog uban sa mga opisyal sa DPWH, DOJ, DBM, Office of the Ombudsman, ug NBI Director Melvin Matibag isip mga resource persons.
