Gipatin-aw sa Philippine National Police (PNP) nga wala sila nakadawat og “validated intelligence” kabahin sa giingong hulga sa seguridad sa selebrasyon sa Independence Day sa Hunyo 12. Matud ni PNP Public Information Office-in-Charge Col. Allen Rae Co, susihon pa sa kapulisan ang maong impormasyon ug gipasiguro nga andam sila sa paghatag og mga impormasyon ug paghimo sa angay nga aksyon kon mapamatud-an kini.
Gipasalig usab sa opisyal nga andam na, alerto, ug fully deployed ang mga pwersa sa PNP aron masiguro ang kaluwasan sa publiko sa Araw ng Kalayaan. Regular usab ang deployment sa mga pulis sa maong adlaw. Dugang pa niini, adunay nakaandam nga contingency plans ang PNP alang sa posibleng insidente, lakip na ang mga kasinatian sa miaging mga protesta nga niresulta og kagubot.
Nagpahimangno usab ang PNP sa publiko nga likayan ang pagpakaylap sa sayop nga impormasyon ug siguruhon una ang beripikasyon sa mga balita nga madawat. Samtang, gikumpirma ni Col. Co nga nakigpulong si PNP Chief PGen. Jose Melencio Nartatez Jr. ug DILG Secretary Jonvic Remulla. Gihisgutan sa maong miting ang security preparations alang sa hapit na nga State of the Nation Address (SONA), seguridad sa Senado, ug ang “Safer Cities” initiative sa DILG.
