Magdeploy ang Davao City Police Office og 1,301 ka kapulisan sugod sa sunod semana aron masiguro ang kalinaw ug kaluwasan sa mga eskwelahan sa pagsugod sa klase alang sa School Year 2026-2027.
Sakop sa security deployment ang 444 ka pampubliko ug pribadong eskwelahan sa tibuok dakbayan sa Davao atol sa Brigada Eskwela ug pormal nga pag-abli sa klase.
Atol sa nahitabong Security Press Briefing gipahibalo ni DCPO spokesperson nga si PCpt.Hazel Caballero nga direktang kamanduan kini gikan sa liderato sa kapulisan.
Dugang niya nga magbutang usab ang DCPO og police assistance desks duol sa mga eskwelahan aron dayong matubag ang mga kabalaka ug reklamo gikan sa mga ginikanan, estudyante ug magtutudlo.
Ang maong lakang kabahin sa mas halapad nga paningkamot sa gobyerno alang sa Oplan Balik Eskwela 2026 nga gipangunahan sa Department of Education.
