Gikuwestiyon ni kanhing Senate President Pro Tempore Loren Legarda ang giingong pagsulay sa pag-usab sa liderato sa Senado pinaagi lamang sa 12 ka boto niadtong Miyerkules, Hunyo 3, ug giingong supak kini sa Konstitusyon ug sa kasamtangang mga lagda sa Senado.Matud pa sa kanhing Senate President Pro Tempore, walay senador nga mahimong mapili o molihok isip Senate President kon wala makab-ot ang gikinahanglang mayoryang boto sa tibuok Senado.
Kini kasunod sa nahitabo sa plenary session diin gipili sa pipila ka mga senador gikan sa minority bloc, uban ni Francis Escudero nga sakop sa majority bloc, si Sherwin Gatchalian isip bag-ong Senate President Pro Tempore ug acting Senate President, human wala motambong ang ubang mga senador sa mayorya.Dugang pa niini, iyang gipatin-aw nga bisan ang ubang mga opisyal sa Senado sama sa Senate President Pro Tempore, Senate Secretary ug Sergeant-at-Arms kinahanglan usab makadawat og dili moubos sa 13 ka boto subay sa Senate Rules.
Giingon usab ni Legarda nga dili mahimong magpadayon ang opisyal nga transaksyon sa Senado kon walay igo nga quorum. Matud niya, kon kulang sa 13 ka miyembro ang anaa sa sesyon, dili usab mahimong maghimo og balidong mga desisyon sama sa pag-ilis sa mga chairmanship sa komite.Lakip sa iyang gipasiugda nga dili angay mamenosan ang representasyon sa mga senador nga gipili sa katawhan tungod lamang sa temporaryong pagkawala o pagliban sa pipila ka mga miyembro.
Sa pagkakaron, nanawagan si Legarda sa hugot nga pagsunod sa Konstitusyon taliwala sa nagkainit nga isyu kabahin sa liderato sa Senado, ug nagpabiling lig-on sa ilang pagtahod sa rule of law ug sa nasudnong balaod.
