Mainitong gidawat ni Major General Alvin Luzon, Commander sa 10th Infantry (Agila) Division, ang walo ka mga bag-ong na-komisyon nga mga opisyal gikan sa Philippine Military Academy “Talang Dangal” Class of 2026 atol sa courtesy call sa Camp General Manuel T. Yan Sr. kagahapong adlawa(Hunyo 2, 2026.)
Ang mga bag-ong opisyal nga gikan sa Region XI mibisita sa Division Commander human sa ilang graduation gikan sa maong prestihiyosong akademya militar sa nasud.
Ang grupo gilangkuban sa duha ka opisyal sa Philippine Army, duha sa Philippine Navy, ug upat sa Philippine Air Force nga andam nang moangkon sa ilang tagsa-tagsa ka mga katungdanan sa Armed Forces of the Philippines.
Atol sa panagtagbo, giawhag ni Maj. Gen. Luzon ang mga bag-ong opisyal nga tumanon ug ipakita ang prinsipyo sa AVL o Accountability, Values, ug Leadership samtang nagsugod sila sa ilang karera sa militar.
Gibutyag usab niini ang kamahinungdanon sa pagbaton og responsibilidad sa ilang mga aksyon ug desisyon, pagsunod sa mga batakang bili sa militar sama sa kaisog, integridad, pagkamatinud-anon, dungog ug serbisyo, ingon man ang pagpakita og liderato nga mahimong maayong ehemplo sa mga sundalo ug komunidad nga ilang pagaalagaran.
Matud pa ni Luzon, ang mga bag-ong opisyal gisaligan sa usa ka giingong balaan nga responsibilidad sa pagpangulo nga adunay integridad, pagserbisyo nga adunay pagkamapaubsanon, ug pagmentinar sa labing taas nga sukdanan sa accountability samtang nag-alagad sa nasud.
Ang maong pagbisita nagpakita sa padayong paningkamot sa AFP sa paghulma og mga lider nga kompetente, disiplinado, ug dedikado sa misyon aron makatampo sa depensa sa nasud, pagmintinar sa kalinaw ug kahapsay, ug pagsuporta sa kalamboan sa lainlaing bahin sa Pilipinas.
