Miangkon ang Department of Education nga nag-atubang ang nasud og seryosong krisis sa literacy human migawas sa usa ka assessment nga 87 porsyento sa mga Grade 11 students adunay kalisod sa pagsabot sa ilang gibasa.
Sumala sa DepEd, ang maong resulta nagpakita sa dugay nang learning gaps sa sistema sa edukasyon sa Pilipinas ug dili lamang problema sa senior high school.
Sa pahayag ni Carmela Oracion, gibutyag niini nga seryoso ang ahensya sa resulta nga gipagawas sa Second Congressional Commission on Education.
Gipasabot sa opisyal nga ang problema sa pagbasa natigom sukad pa sa unang mga grado ug misamot tungod sa kakabos, kakulang sa learning materials, limitado nga suporta sa panimalay, mga paghunong sa klase ug epekto sa pandemya.
Matud pa niya, dili usa lamang ka hinungdan ang nakahatod sa literacy crisis kondili usa kini ka sistemikong problema sa edukasyon.
Isip tubag kabahin sa maong problema, nagpatuman ang DepEd og summer remediation program alang sa senior high school students ug nangandam usab og bag-ong literacy assessments sa dili pa magsugod ang klase aron mailhan ang mga estudyanteng nagkinahanglan og dugang tabang ug tutoring (tutorial).
Ilakip usab sa bag-ong three-term school calendar ang remediation ug enrichment activities aron mas matubag ang learning gaps sa tibuok school year.
Giangkon usab sa DepEd nga padayon gihapong hagit ang bug-at nga workload sa mga magtutudlo.
