Mokabat na sa gibanabanaang 1,400 sa kapin 2,000 ka mga bukog nga narekober gikan sa Taal Lake ang napamatud-ang mga bukog sa tawo, sumala sa Philippine National Police Forensic Group, isip kabahin sa nagpadayong imbestigasyon sa pagkawala sa mga sabungero.
Matud pa Acting Director PCol. Pierre Carpio, sa tanang bukog nga ilang nasusi hangtod karon, mokabat sa 1,400 ang napamatud-ang gikan sa mga tawo human sa serye sa forensic examinations.
Gipasabot ni Carpio nga ang mga bukog giagi sa medico-legal examination, anthropological examination, radiographic imaging, dental examination, ug DNA analysis aron masiguro ang hustong pag-ila niini.
Apan, wala pa mahuman ang tibuok proseso sa imbestigasyon ug padayon pa gihapon ang mga eksaminasyon ug beripikasyon sa mga ebidensiya nga narekober.
Dugang pa niya, wala pa matino sa pagkakaron kung adunay DNA profiles gikan sa mga narekober nga bukog nga motugma sa mga biktima sa kaso sa mga nawagtang nga sabungero.
Subay sa pahayag ni Carpio, gibutyag niining mokabat sa 2,000 ka mga bukog ang gisusi sa PNP Forensic Group isip kabahin sa imbestigasyon sa giingong kidnapping ug pagpatay sa labing menos 34 ka sabungero nga nahanaw tali sa tuig 2021 ug 2022.
