Gikompirma ni NBI Dir. Atty. Melvin Matibag nga andam ang National Bureau of Investigation (NBI) sa pagdakop kang Sen.Jinggoy Estrada bisan pa kon anaa kini sulod sa Senado.
Ang pahayag gisunod sa pagpagawas sa Sandiganbayan og warrant of arrest batok kang Estrada niadtong Mayo 29, 2026, may kalabotan sa giingong anomalosong flood control projects.
Matud sa Office of the Ombudsman, mokabat sa P573 milyon ang giingong kickbacks nga nadawat sa senador gikan sa maong proyekto. Giingon usab sa Ombudsman nga walay piyansa ang kasong plunder nga gipasaka batok kaniya.
Atol sa press briefing, gitandi ni Matibag ang sitwasyon sa naunang pagsulay sa mga otoridad sa pagpatuman sa warrant of arrest batok kang Sen.Ronald dela Rosa niadtong Mayo 11, 2026.
Matud pa sa NBI chief, kon adunay balidong lokal nga warrant of arrest, legal ang pagdakop sa akusado bisan anaa pa kini sulod sa Senado.
Gipahinumdoman usab sa NBI nga adunay mga unang kaso diin nadakpan ang mga magbabalaod bisan pa nga anaa sa ilang katungdanan, lakip sila ni kanhing Sen. Leila de Lima, Antonio Trillanes IV ug ang mipanaw na nga si Juan Ponce Enrile.
