Giaresto ang usa ka lalaki nga ni-angkon nga survivor sa mihugnong estruktura sa Balibago, Angeles City, Pampanga.
Una nang nag-viral ang video sa maong lalaki human niya isugilon nga nakalingkawas siya sa trahedya tungod kay nipalit kuno siya og beer duol sa lugar sa dihang nahitabo ang pagguho.
Apan, nabutyag nga dili siya survivor ug dili usab paryente sa mga biktima sa insidente. Giangkon usab kuno niini nga hinimo-himo lamang ang iyang istorya.
Nasayran usab nga nakadawat ang lalaki og pinansyal nga tabang gikan sa DSWD ug nangayo pa og dugang nga ayuda, maong gisusi ang iyang identidad.
Samtang, nagpasidaan ang Pamahalaang Siyudad sa Angeles ngadto sa publiko ug media nga magmatngon batok sa mga indibidwal nga nag-angkon nga biktima o survivor sa gumuhong estruktura.
