Gipasabot sa Philippine National Police (PNP) sa publiko nga walay espesyal nga pagtratar nga madawat si Senador Ronald “Bato” dela Rosa taliwala sa mga isyu kabahin sa warrant of arrest nga nalambigit kaniya.
Sumala kang PNP Chief General Jose Melencio Nartatez Jr., magpabiling nakabase sa balaod ug mandato sa organisasyon ang tanang lihok sa kapulisan, bisan unsa pa ang ranggo o posisyon sa usa ka indibidwal.
Gihimo sa PNP ang maong pahayag human sa mga pangutana sa publiko kung mahimong hugot ba ang pagpatuman sa balaod batok sa senador tungod sa iyang kanhing posisyon isip hepe sa pambansang pulisya ug dugay nang koneksyon sa organisasyon.
Dugang pa sa PNP chief, iyang gimandoan ang tanang yunit sa pulisya nga hugot nga sundon ang standard operating procedures sa bisan unsang operasyon nga may kalabutan kang Dela Rosa.
Si Dela Rosa nag-atubang og isyu kabahin sa warrant of arrest gikan sa International Criminal Court (ICC).
Nagpagawas usab si Nartatez og direktiba sa mga police commander nga likayan ang bisan unsang preferential treatment ug dili otorisadong pagpagawas sa impormasyon nga mahimong makaapekto sa operasyon sa pulisya.
