Magpasaka og reklamo ang Philippine National Police Criminal Investigation and Detection Group (PNP-CIDG) batok kang Senador Robin Padilla ug uban pa tungod sa giingong pagtabang kang Senador Ronald “Bato” dela Rosa aron makalikay o makasibat sa balaod.
Sa usa ka pamahayag, gikanayon sa CIDG nga ilahang irefer sa National Prosecution Service sa Department of Justice (DOJ) ang reklamo may kalabotan sa giingong paglapas sa Presidential Decree No. 1829 o obstruction of justice.
Matod sa ahensya, ang pagpasakay ni Padilla kang dela Rosa dili lamang ordinaryong “hitch ride” kondili usa ka “highly coordinated, pre-planned logistical maneuver” aron sumala pa dili madetekan samtang mogawas sa Senado sa kaadlawon niadtong Mayo 14.
Migawas usab sa imbestigasyon nga adunay laing sakyanan nga nagsunod sa sakyanan ni Padilla, nga giingong nagsilbing security escort ug backup car sa maong operasyon.
Gipasabot sa CIDG nga ang pagpasaka nila sa reklamo subay sa ilahang mandato sa pag-imbestiga sa mga krimen ug pagpatuman sa balaod sa patas ug walay pili nga paagi.
Gibutyag sa CIDG nga kung adunay mga indibidwal nga aktibong manghilabot sa pag-aresto o motabang sa pag-ikyas sa mga criminal offenders aron malikayan ang pagkasikop, makadaot kini sa justice system ug makompromiso ang public order.
Gibutyag usab nila nga ang bisan unsang obstruction of justice adunay tukmang criminal prosecution.
