Gitambungan sa mga nagkadaiyang opisyal sa kapulisan ug sa LGU Davao lakip ang ubang sektor sa katilingban ang usa Ribbon Cutting Ceremony sa Masaligan Hall ug sa Patrollers Commendation Day nga gihimo sa PS1 Sta.
Pasado alas 8:00 kaganihang buntag, mitambong si PCOL Peter Bauzon Madria, City Director sa Davao City Police Office (DCPO), uban ni PMAJ Richeen Lagnayo, Station Commander sa PS1 Sta. Ana, ug ni PMAJ Marc Hedssel Culaste, Deputy Station Commander, atol sa maong kalihukan.
Mitambong usab ug gipasidunggan isip Guest of Honor and Speaker si Councilor Atty. Luna Acosta, uban sa mga tinahud nga barangay officials.
Ang ilang presensya nagpakita sa lig-on nga panaghiusa tali sa lokal nga gobyerno, mga lider sa komunidad, ug kapulisan sa pagpalambo sa kalinaw ug kahapsay sulod sa siyudad.
Kabahin usab sa seremonya ang paghatag og pagkilala ug pasidungog sa mga top-performing personnel, isip pagpasalamat sa dedikasyon ug sakripisyo sa mga field officers kansang walay hunong nga serbisyo nagpadayon sa pagpalig-on sa kaluwasan sa publiko.
Kini nga pagpasidungog nagpakita sa lig-on nga paningkamot sa DCPO sa paghatag bili sa ilang mga personnel ug sa pagdasig sa kahusayan sa serbisyo publiko.
Human sa awarding ceremony, gihimo ang opisyal nga ribbon cutting isip timaan sa pag-abli sa Masaligan Hall, usa ka pasilidad nga gituyo nga mahimong sentro sa kolaborasyon, kabag-ohan, ug pakiglambigit sa komunidad.
Ang pagtukod niini nga hall nagsimbolo sa aktibong pagpangulo sa DCPO sa pagpalig-on sa panaghiusa ug pagpaayo sa operational capability dili lamang alang sa ilang mga personnel kondili alang usab sa kaayohan sa katawhan sa Davao City.
