Posible na usab nga mosaka ang presyo sa mga produktong petrolyo sa sunod semana tungod sa padayon nga problema sa suplay sa lana gumikan sa tensyon sa Middle East kon sa tungang Sidlakan.
Subay sa gipaguwang pamahayag sa industriya sa lana pinaagi sa resulta sa Mean of Platts Singapore o MOPS ug foreign exchange trading sa milabayng upat ka adlaw, posibleng mosaka ang presyo sa diesel ug gasolina.
Gibanabanaan nga mosaka og P1.00 hangtod P1.30 kada litro ang diesel samtang mahimong mudugang og P1.20 hangtod P1.50 kada litro ang gasolina.
Matud sa usa ka source gikan sa oil industry, padayon nga naapektuhan ang diesel tungod sa taas nga presyo sa krudo ug sa wala pa masulbad nga problema sa suplay sa lanna sa pangkalibutang merkado.
Samtang, nagpabilin usab nga taas ang presyo sa gasolina tungod sa limitado nga global supply ug pagsaka sa demand ilabina sa Estados Unidos uban sa pagsugod sa peak summer season.
Bisan pa man sa gamay’ng pagkunhod sa presyo sa krudo bag-ohay lang tungod sa positibong peace talks tali sa Amerika ug Iran, matud sa source nga nagpabilin gihapong dili lig-on ang lihok sa presyo tungod kay wala pa’y kasiguruhan kung kanus-a matapos ang tensyon sa Middle East.
Kasagarang ginapahibalo sa mga kompanya sa langis ang ilang price adjustment matag Lunes ug ipatuman kini inig-abot sa Martes.
