Giabrihan sa 10th Infantry (Agila) Division sa Philippine Army ang Inter-Agency Territorial Defense ug Civil Defense Operations Exercise sa Mati City, Davao Oriental niadtong Mayo 16, 2026, nga nagtinguha sa pagpalig-on sa kahapsay sa operasyon, interoperability, ug koordinasyon sa krisis sa mga ahensya sa gobyerno.
Nanguna si Governor Nelson Dayanghirang, isip Guest of Honor ug Speaker alang sa opening ceremony nga gitambongan sa military units, LGUs, civil defense authorities, ug partner agencies.
Gipanguluhan usab ni Brigadier General Vince James Bantilan kabahin sa partisipasyon sa 1001st Infantry Brigade isip lead unit sa Joint Task Force Agila.
Nasayran nga ang siyam ka adlaw nga ehersisyo naglakip sa lain-laing simulation ug capability development activities aron mapalig-on ang koordinasyon sa militar, LGUs, civil defense, ug uban pang ahensya sa pagresponde sa mga hulga sa seguridad ug emerhensya.
Samtang mipasidungog usab si Maj. Gen. Elmer Suderio sa maong inisyatiba ug mipasiugda sa kamahinungdanon sa panaghiusa sa pagpanalipod sa nasod.
Gibutyag ni Maj. Gen. Alvin Luzon nga kini nga ehersisyo nagpakita sa whole-of-nation approach sa AFP ug ipadayun ug palapdan pa sa tibuok rehiyon.
Anaa usab sa maong kalihukan sila Lt. Gen. Adonis Ariel Orio, Gov. Edwin Jubahib, Gov. Raul Mabanglo, ug Director Eugenio Gepte Jr. sa Office of Civil Defense.
