Gibana-banaan nga mokabat sa dos milyones ang danyos sa nahitabong dakong sunog nga miulbo kagahapon sa hapon sa Saturn Street, GSIS Heights Subdivision, Barangay Matina Crossing, ning syudad sa Davao City.
Sumala sa datos gikan sa Bureau of Fire Protection nga anaa sa duha ka mga balay ang totally damaged nga adunay onsi ka mga apektadong indibidwal.
Kahinumduman nga pasado alas singko sa hapon, miulbo ang kusog nga sunog sa nasampit nga lugar.
Base sa inisyal nga impormasyon, kusog ang kalayo nga paspas nga misilaob hinungdan nga miabot usab ang laing mga kabomberohan sa maong dapit aron nga mapugngan ang pagkuyanap sa kalayo sa kasikbit nga mga panimalay.
Sa pagkakaron, wala pa gikabutyag ang hinungdan sa pag-ulbo sa kalayo.
Samtang gitaho usab sa mga otoridad nga adunay 53-anyos nga gikatahong nakaangkon og 1st degree burn atol sa maong panghitabo nga karon anaa na sa luwas ang kahimtang.
