Wala na sa sulod sa senado si Senator Ronald “Bato” dela Rosa, nga giisyuhan og public warrant sa International Criminal Court (ICC) niadtong Mayo 11 tungod sa giingong papel niini sa giyera kontra droga ni kanhi Pang. Rodrigo Duterte.
Subay sa pamahayag ug pagkumpirma sa usa ka opisyal sa secretariat sa upper chamber nga kaganihang kaadlawon nigawas sumala pa ang senador.
Kini nga kalamboan nahitabo human giingong adunay grupo sa mga armadong lalaki nga misulay pagsulod sa chamber pinaagi sa ikaduhang andana Miyerkules sa gabii, apan gipugngan sila sa mga personnel sa Senate Office of the Sergeant-at-Arms (OSAA), nga giingong nakapabuto pa og warning shots.
Samtang sumala usab sa pamahayag ni Pang. Marcos Jr., walay mga personahe sa gobyerno nga nagpabuto sa mga warning shots ug gilayon niining gimando ang lawom nga imbestigasyon kabahin sa insidente.
Walay na-report nga nasamdan sa nahitabo.
Una na nga gipailawom si Dela Rosa ubos sa protective custody sa Senado ning semanaha lamang human misulay ang mga ahente sa National Bureau of Investigation (NBI) sa pagsilbi sa warrant nga may kalabutan sa ICC.
Si dela Rosa maoy subject sa warrant sa ICC nga nagtinguha sa iyang pagdakop kalabot sa imbestigasyon sa war on drugs nga gisang-at batok kang Duterte, nga karon gitanggong sa internasyonal nga tribunal sa The Hague, Netherlands.
Ang legal counsel sa senador nga si Israelito Torreon, una nang mibutyag nga nagpabilin pa si dela Rosa sulod sa chamber diin nangayo kini og panalipod aron malikayan ang pagdakop ug pagbalhin ngadto kaniya sa ICC.
Sa pagkakaron, wala pa makapagawas og klarong pahayag ang Senado kabahin sa eksaktong nahimutangan ni dela Rosa human sa nahitabong kaguliyang kagabii.
