Gikontra ni Senador Ronald “Bato” dela Rosa ang panawagan sa lima ka kaubang senador nga boluntaryo siyang mosurender sa International Criminal Court, samtang lig-on niyang gipadayag nga dili siya magpaaresto samtang padayon ang iyang paggamit sa mga legal nga remedyo.
Sumala pa sa senador, dili siya mosugot nga mosurender ug gihangyo niya ang mga nagsumite sa Senate Resolution 395 nga dili unta paspason ang posibilidad sa iyang pag-aresto.Lakip sa mga mipirma sa maong resolusyon sila ni Senate Minority Leader Vicente “Tito” Sotto III, Panfilo Lacson, Risa Hontiveros, Francis “Kiko” Pangilinan ug Bam Aquino.
Dugang pa niini, nagtuo ang senador nga kadaghanan sa mga Pilipino ang mosupak sa ideya nga dad-on siya sa ICC.Sa pagkakaron, gipadayag usab niya ang iyang kasubo ug pagkadismaya sa panawagan sa pipila niyang kaubang magbabalaod nga mosurender siya, ilabi na sa pagkakita niya nga lakip si Lacson sa mga mipirma sa resolusyon.
Subay sa iyang pahayag, mas nasakitan siya tungod kay dugay na niyang kauban sa serbisyo publiko si Lacson ug wala niya damha nga mouban kini sa maong panawagan.
