Ipadayon na sa Philippine National Police o PNP ang fact-finding review niini kalabot sa extra-judicial killings (EJKs) ug uban pang may kalabutang mga insidente.
Kini human gimando ni DILG Sec.Jonvic Remulla, sa Department of the Interior and Local Government o DILG, ngadto sa nasudnong kapulisan ubos sa pagpanguna ni PNP Chief Jose Melencio Nartatez Jr. nga ipadayon ang imbestigasyon sa mga na-report ug reklamo kalabot sa EJK-related incidents sa miaging police operations, lakip na sa panahon nga nagsilbi pang Davao City Police Director si Sen. Ronald “Bato” dela Rosa.
Kalabot niini, gibutyag sa PNP Chief nga ipadayon sa PNP ang imbestigasyon base sa ebidensya nga nakaangkla sa existing case materials ug reports nga gisumite sa nagkadaiyang police units ug oversight bodies.
Gikompirma usab sa heneral nga gitahasan ang Criminal Investigation and Detection Group o CIDG aron mangulo sa imbestigasyon ug magsugod sa pag-isyu og subpoenas ngadto sa mga indibidwal nga nalambigit sa case records isip kabahin sa standard fact-finding procedures.
Giklaro sa PNP nga ang subpoena dili arrest warrant kondili legal nga mga dokumento nga nagtumong sa pagkuha og impormasyon ug pagpatin-aw sa ilang findings.
Gipasalig usab sa mga opisyal nga ang proseso himuon nga patas ug walay pinili.
Sumala ni Nartatez, posible nga imbitaron aron mohatag og impormasyon ang mga indibidwal nga ginganlan sa mga miaging reports lakip na si kanhi PNP Chief Dela Rosa.
Gipasabot sa PNP nga ang maong review nagtumong sa pagtubag sa dugay nang mga pangutana kalabot sa miaging operasyon ug aron mas mapalig-on pa ang institutional accountability.
