Gipamugos ni Sen. Rodante Marcoleta nga gigamit kuno ni Sen. Panfilo Lacson ang iyang privilege speech aron magpahamtang og alegasyon nga wala pa’y hingpit nga ebidensya kalabot sa imbestigasyon sa giingong anomalya sa flood control projects. Sa gipagawas nga pahayag, gibatikos ni Sen. Marcoleta ang slide presentation nga gipakita ni Lacson diin adunay nakabutang nga “allocable” alang kaniya, nga matud pa niya gigamit aron ipakita nga nangayo siya og proyekto nga nagkabalor og P500 milyon.
Sumala pa kang Sen. Marcoleta, kasagarang praktis lamang sa mga magbabalaod ang pag-endorso og mga proyekto alang sa ilang constituents ug dili kini pasabot nga personal nilang mapahimuslan ang maong pondo. Lakip sa iyang gipasiugda nga mas importante nga masuta kung tarong bang naimplementar ang mga proyekto kaysa sa simpleng pagrekomenda o paghangyo niini.
Dugang pa niini, gihagit usab ni Marcoleta si Lacson nga ipatawag sa hearing sila Adrian Bersamin, Lean Leviste, ug Jojo Cadiz kalabot sa giingong accounting sa flood control funds nga adunay detalye kon asa padulong ang bilyon-bilyong pisong giingong kickbacks.
Gipahayag usab ni Sen. Rodante Marcoleta ang alegasyon ni Zaldy Co mahitungod sa giingong paghatod og kuwarta ngadto sa usa ka address sa South Forbes ug sa giingong pagkadawit nila Martin Romualdez ug pipila ka mga opisyal sa administrasyon. Giingon usab niini nga nga kinahanglan kunong ipatawag ang tanang personalidad nga nalambigit aron mabuo ang “tibuok hulagway” sa kontrobersiya ug aron mahatagan og hustisya ang katawhan.
Sa kasamtangan, gibalik usab niya ang pagpangutana nganong wala pa mahuman ang report sa Senate Blue Ribbon Committee bisan pa sa pila na ka bulan nga pagpaminaw o hearing. Gitawag usab niya nga “partial” ug “incomplete” ang kasamtangang report sa komite.
