Nisaad ang Thailand ug Cambodia nga ipadayon ang abre nga komunikasyon ug likayan ang mga lihok nga makapasamot pa sa tensyon human sa trilateral meeting nga gipangulohan sa Philippines sidelines sa 48th ASEAN Summit.
Gipangunahan usab kini ni President Ferdinand Marcos Jr. ang maong tigom uban nila ni Hun Manet ug Anutin Charnvirakul isip kabahin sa papel sa Pilipinas isip ASEAN chair.
Matod ni PBBM, tumong sa maong panagtigom ang paghatag og “meaningful space for constructive dialogue” kabahin sa nagpadayon nga panagbangi sa border sa duha ka nasod.
“The Philippines arranged this meeting… to provide a meaningful space for constructive dialogue,” matod sa Pangulo. Sa joint press conference, giingon sa Pangulo nga parehong giila sa duha ka lider ang kamahinungdanon sa pagpugong sa tensyon, padayon nga komunikasyon, ug malinawon nga pagsulbad sa panagbangi.
Nahimo ang maong tigom taliwala sa nagkagrabeng tensyon tali sa Thailand ug Cambodia tungod sa gilalisang mga teritoryo duol sa Preah Vihear Temple ug pipila ka bahin sa Gulf of Thailand.
Nagpasalamat sila Hun Manet ug Anutin sa Pilipinas sa pagpagaan sa dayalogo.
Samtang, gipasabot ni Anutin nga importante nga malikayan ang panagbangi sa duha ka silingang nasod.
Dungan niini, gipahibalo usab ni PBBM ang pagpalapad sa mandato sa ASEAN Observer Team hangtod Hulyo aron ipadayon ang pagbantay sa pagtuman sa mga kasabotan tali sa Thailand ug Cambodia.
