Dili kuno dapat ilambigit sa isyu sa press freedom ang kontrobersiya nga naglibot sa pagkasikop sa founder sa Peanut Gallery Media Network kalabot sa alegasyong extortion batok sa usa ka politiko.
Sa pakighinabi sa Bombo Radyo gipaklaro ni Prof. Danilo Arao nga bisan pa mahimong isipon nga usa ka news media organization ang PGMN ug ang ilahang mga anchor teknikal nga nagahimo og pamahayag, importante gihapon nga susihon kung ang ilang gihimo subay ba sa responsableng journalism.
Matod ni Arao, ang gitawag nga “kill fee” diin adunay alegasyon nga nangayo og bayad kambyo sa dili pagpagawas sa usa ka balita usa ka klarong paglapas sa ethics sa journalism.
Apan, iyang gibutyag usab ang importansya sa patas nga pagtan-aw sa maong isyu ilabi na kay gilimod sa kampo sa PGMN ang alegasyon ug miingon nga sila gi-set up lamang.
Gipangutana usab ni Arao ang mga kahimtang nga naglimen sa kaso, lakip na ang giingong transaksyon sa dakong kantidad sa kuwarta sa gabi nga iyang giingong kadudahan sa konteksto sa lehitimong negosyo.
Gipasabot usab sa propesor nga ang maong kaso dili dapat tan-awon isip pag-atake sa media kundili usa ka ordinaryong criminal case kung mapamatud-an nga adunay nahitabong pangingikil.
Samtang kabahin niini, gikuwestiyon usab ni Arao ang kredibilidad sa PGMN isip usa ka “alternative media” platform. Matod niya, ang tinuod nga alternative media nagasunod gihapon sa labing taas nga sumbanan sa journalism lakip ang accountability ug pagsunod sa code of ethics.
