Gitay-og ang Ukraine sa dagkong drone ug missile strikes gikan sa Russia niadtong gabii sa Mayo 5, nga nakaigo sa power grid ug uban pang imprastraktura, ug nakaalaot og kinabuhi sa lima ka tawo samtang 39 ang nasamdan.
Matod sa Ukrainian Air Force, migamit ang Russia og 11 ka Iskander-M ballistic missiles ug 164 ka drones sa sunod-sunod nga pag-atake.
Bisan pa nga kadaghanan niini na-intercept, adunay pipila nga nakaigo sa ilang target lakip ang mga pasilidad sa enerhiya sa Ukraine. Nabutang sa peligro ang mga natural gas facility sa Poltava ug Kharkiv regions, sumala sa state energy firm nga Naftogaz.
Gibutyag sa kompanya nga balik-balik na nilang nasinati ang pag-atake sukad pa sa pagsugod sa tuig.
Tungod niini, gikondena ni Ukrainian President Volodymyr Zelenskyy ang mga pag-ataki ug gitawag kini nga daw walay kasingkasing ang Moscow, ilabi na nga nahitabo kini taliwala sa temporaryong ceasefire.
Sumala sa Russia, magpatuman kini og unilateral ceasefire sa umaabot nga mga adlaw alang sa paggunita sa Victory Day, apan mibahad kini nga mubalos sila kung moatake ang Ukraine.
