Gipasalig sa Department of Energy (DOE) nga igo ang suplay sa lana sa nasud ug wala kini plano nga mo-order og dugang fuel sa karon, bisan pa sa bag-ong pagsaka sa presyo sa mga produktong petrolyo sugod karong adlawa.
Sumala kang Energy Secretary Sharon Garin, dili pa kinahanglan ang bag-ong order tungod kay igo ang suplay ug limitado usab ang storage facilities sa nasud. Matod niya, naa na sa 150 milyones ka litro sa diesel ang naproseso ug gigamit isip buffer.
Base sa datos sa DOE, igo ang suplay sa nasud sulod sa 53.71 ka adlaw. Lakip niini ang gasolina (52.64 ka adlaw), diesel (54.58 ka adlaw), kerosene (166.67 ka adlaw), jet fuel (71.14 ka adlaw), fuel oil (62.69 ka adlaw), ug liquefied petroleum gas o LPG (40.46 ka adlaw).
Gawas niini, gilauman nga mosaka usab ang presyo sa LPG og P1.33 matag kilo karong bulana, tugbang kini sa P13.42 nga dugang sa matag 11-kilogram cylinder.
Sa isyu sa kuryente, gibutyag ni Garin nga gisuportahan sa DOE ang sugyot nga tangtangon ang value-added tax (VAT) sa kuryente aron moubos ang gasto sa mga konsyumer, bisan pa nga anaa sa Department of Finance ang pinal nga desisyon.
Samtang, gipasalig usab sa DOE nga igo ang suplay sa kuryente sa nasud bisan sa kasamtangang kainit sa panahon, ug padayon nga ginabantayan ang demand aron malikayan ang kakulang sa suplay.
