Gilimod sa United States Central Command ang report nga giigo sa Iran ang usa ka U.S. Navy vessel, human sa pahayag sa pipila ka Iranian news agencies nga adunay giatake nga barko duol sa usa ka pantalan sa habagatan-sidlakang bahin sa Strait of Hormuz.
Sumala sa Iran, ang maong barko nakalapas sa maritime security ug napugos nga moatras.
Apan gibutyag sa U.S. Central Command nga walay bisan unsang Navy ship nga naigo sa insidente.
Dungan niini, gipahibalo sa U.S. military ang bag-ong inisyatiba nga giendorso ni U.S. President Donald Trump, diin posibleng gamiton ang naval ug air assets aron giyahan ang mga commercial vessels sa Strait of Hormuz, diin daghang barko ang naipit tungod sa tensyon.
Sumala sa report, adunay pipila ka barko nga giatake o gipugngan sa Iran kung wala kini’y pagtugot.
Gipahimangnoan usab ang mga barko nga moagi sa katubigan sa Oman taliwala sa gitukod nga “enhanced security area.”
Gitawag sa Iran ang lakang sa U.S. nga paglapas sa kasamtangang ceasefire, samtang gibutyag sa Estados Unidos nga kabahin kini sa “Project Freedom” nga nagtinguha sa pagtabang sa mga na-stranded nga seafarers nga nag-atubang og kakulang sa pagkaon ug tubig taliwala sa gubat.
