Nanawagan si Senator Francis “Chiz” Escudero sa gobyerno nga gamiton ang ₱30-bilyon nga Rice Competitiveness Enhancement Fund (RCEF) aron matabangan ang mga mag-uuma sa Mindanao, ilabina karon nga nagsugod na ang epekto sa hulaw o dry spell sa pipila ka lugar.
Sumala sa (PAG-ASA) Philippine Atmospheric, Geophysical and Astronomical Services Administration, unom ka mga probinsya ug ang pipila ka bahin sa Davao region ang pektado na sa dry spell.
Gipasabot ni Escudero nga ang maong pondo, nga gihimo ubos sa Republic Act No. 11203 o Rice Tariffication Law, mahimong gamiton aron matabangan ang mga mag-uuma nga nag-atubang sa kakulangon sa ulan, pagsaka sa presyo sa krudo, ug sa umaabot nga El Niño nga gilauman magsugod sa Hunyo.
Matud pa niya, adunay ₱15-bilyon nga bahin sa RCEF nga gitagana alang sa “Other Priority Programs, Activities and Projects” nga mahimong i-realign alang sa mga lakang nga makapalig-on sa produksyon ug suplay sa bugas.
Dugang pa sa nahisgutang senador, kini mahimong gamiton alang sa dugang pinansyal nga tabang, rice credit, suporta sa irigasyon, ug uban pang lakang batok sa emerhensya sa produksyon sa humay.
Sumala usab sa PAGASA, ang dry spell molungtad pa ngadto sa tulo ka sunod-sunod nga bulan diin ubos sa normal nga ulan (21% hangtod 60% nga pagkunhod) diin nakita na sa mosunod nga mga lugar: Basilan, Davao del Norte, Davao del Sur, Sulu, Tawi-Tawi, Zamboanga del Sur ug Davao City.
Gibutyag usab sa PAGASA nga 13 ka mga probinsya sa Mindanao ang ubos sa “dry condition,” nga nasinati ang hinay nga klase sa hulaw nga adunay duha ka bulan nga ubos sa normal ang ulan.
Hinoon sa pagkakaron, wala pay probinsya sa Mindanao nga giila nga naa sa drought status.
Apan sa Luzon, adunay mga lugar sama sa Isabela ug Cagayan nga naka-experyensya na og drought o hulaw.
Tungod sa padayon nga kakulang sa ulan ug sa umaabot nga El Niño, giingon ni Escudero nga ang mga lakang sa gobyerno kinahanglan “forward-looking” aron malikayan ang dakong kadaot sa produksyon ug masiguro ang igo nga suplay sa bugas.
