Gipagawas sa Anakbayan Southern Mindanao Region ang ilang press statement subay sa pagsaulog sa Labor Day karung adlawa, May 1, 2026, diin ilang gipasiugda ang mga isyu nga giatubang sa mga mamumuo, kabatan-onan ug ubang progresibong sektor sa Davao City.
Sumala pa sa grupo, miapil sila sa usa ka mass mobilization nga gipahigayon sa Freedom Park aron ipadayag ang ilang mga panawagan lakip na ang pagsupak sa VAT ug excise tax sa batakang panginahanglanon, ug ang paghangyo sa P1,200 nga nasudnong minimum nga sweldo.Lakip sa gihisgutan sa chairperson nga si Fauzhea Guiani, ang padayon nga pagsaka sa presyo sa mga palaliton ug ang kalisod sa mga mamumuo tungod sa giingong dili patas nga sistema sa pagbuwis nga nakaapekto sa ilang panginabuhi.
Dugang pa niini, giingon nga ang kasamtangang minimum wage sa siyudad nga P525 alang sa non-agricultural ug P515 sa agricultural sector dili igo aron matubag ang adlaw-adlaw nga panginahanglan sa pamilya, nga ilang giingong layo sa angay nga living wage.Sa kasamtangan, gisaway usab sa grupo ang mga polisiya sa gobyerno nga ilang giingong pabor sa dagkong kapitalista, lakip ang oil deregulation, nga mitultol sa dugang nga pagsaka sa presyo sa produktong petrolyo ug ubang palaliton.
Sa pagkakaron, nagpadayon ang panawagan sa grupo alang sa mas lapad nga kausaban sa ekonomiya pinaagi sa industriyalisasyon ug mas lig-on nga papel sa kabatan-onan sa pagduso sa sistematikong kausaban alang sa kaayohan sa mamumuo.
