Gipahibalo sa Department of Energy (DOE) nga posibleng mosaka ang presyo sa mga produktong petrolyo sa sunod semana tungod sa padayon nga pag-ubos sa peso kontra dolyar.
Sumala sa pasiunang datos gikan sa Mean of Platts Singapore (MOPS), gibana-banaan nga ang presyo sa diesel mahimong mosaka ug P1 hangtod P3 kada litro, samtang ang gasolina posibleng mosaka ug P1 hangtod P2 kada litro.
Sumala ni Energy Secretary Sharon Garin nga ang mga unang indikasyon sa global oil trading nagpakita og upward pressure sa presyo sa lana, nga posibleng moresulta sa bag-ong pagsaka sa presyo sa mga gasolinahan.
Sumala pa sa DOE, nagpaabot pa sila sa final trading results hangtod karong Biyernes ayha nila kumpirmahon ang eksaktong adjustment sa presyo sa petrolyo.
Kasagaran, ginapahibalo sa mga kumpanya sa lana ang mga kausaban sa presyo sa produkto kada Lunes ug ipatuman kini sa adlaw’ng Martes.
