Namonitor ang usa ka barko sa China Coast Guard sa Philippine civilian mission nga padulong sa Pag-asa Island sa West Philippine Sea sayo sa buntag adlaw nga Biyernes, sumala sa civil society group nga Atin Ito.
Matod sa mga awtoridad, ang barko sa China Coast Guard nga adunay bow number 3103 nakita mga alas 7:20 sa buntag, nga nahimutang sa gibana-banaan nga anaa sa 3.2 nautical miles gikan sa civilian mission vessel nga MV Kapitan Felix Oca.
Ning higayona, ang barko nga nagdala sa bandira sa Pilipinas anaa sa 90 nautical miles gikan sa Manila ug 60 nautical miles sa kasadpang bahin sa Mindoro, sumala pa sa grupo.
Ang maong civilian convoy kabahin sa inisyatibo sa Atin Ito aron nga ipakita ang presensya sa nasud sa mga giilugan nga katubigan.
Sa pagkakaron, wala pa mopagawas og pahayag ang Chinese Embassy sa Manila kabahin sa insidente.
Kahinumduman nga boluntaryong milayag padulong sa Pag-asa Island ang 100 ka mga sibilyan ug pipila ka myembro sa media alang sa “Balik Pag-asa 4th Civilian Mission,” nga nagtumong nga ipadayag sa kalibutan nga ang isla kabahin kini sa teretoryo Pilipinas.
Dugang pa nga tumong usab sa misyon ang pagpalapad sa presensya sa mga sibilyan sa nagkalain-laing bahin sa West Philippine Sea, pagsupak sa Chinese disinformation campaign, ug paghatag og food ug fuel assistance sa atong mga kababayan ug mga mananagat sa Pag-asa Island.
Kabahin usab kini sa aktibidad sa isla ang pagsakay sa mga partisipante sa jetski samtang ilahang gikayab-kayab ang bandira kon flag sa Pilipinas.
