Gidepensahan sa Malacañang Palace nga walay “premature” sa pahayag ni Pang. Ferdinand Marcos Jr. kabahin sa giingong pagka-detain sa kanhi House appropriations panel chair nga si Zaldy Co sa Czech Republic.
Sumala kang Palace Press Officer Usec. Claire Castro, sakto ang impormasyon sa Pangulo nga si Co anaa sa kustodiya sa Czech authorities ug gipugngan ang iyang lihok, bisan pa man nga dili kini opisyal nga “arrest” sumala sa klaripikasyon sa Department of Justice.
Gipasabot usab ni Castro nga ang pulong nga “nahuli” nga gigamit sa Pangulo usa ka kinatibuk-ang termino nga mahimong magpasabot sa pagka-hold o restriction sa lihok, ug dili kinahanglan nga legal nga pag-aresto.
Samtang, gikompirma sa DOJ nga si Co wala gidakop, kundili gipugngan lamang kini tungod sa posibleng paglapas sa immigration rules human sa giingong pagsulay sa pagtabok sa Czech-German border nga walay travel documents.
