Gibarugan ni House Committee on Good Government and Public Accountability chair, Rep. Joel Chua, nga adunay awtoridad ang House Justice Committee sa pagkuha sa tax records ni Vice President Sara Zimmerman Duterte. Gipahayag sa mambabalaud nga ang maong lakang kabahin sa klaripikasyon sa pagpa-subpoena sa panel ngadto sa Bureau of Internal Revenue (BIR) aron mapagawas ang income tax returns (ITRs) sa bise presidente.
Gipasiugda usab ni Rep. Chua nga aduna gayod gahum ang komite sa pag-isyu og subpoena ug sakop niini bisan pa ang mga ahensya sama sa BIR. Dugang pa, gituohan sa abogadong mambabalaud nga bisan wala giablihan ang “green box” nga naglangkob sa tax records ni VP Sara, gitugotan gihapon sa balaod ang pagkuha niini pinaagi sa congressional subpoena.
Gipunting usab niya nga ang Konstitusyon naghatag og gahum sa Kongreso sa paghimo sa kaugalingong rules ug pag-authorize sa pag-isyu sa subpoena isip kabahin sa ilang oversight function.
Sa kasamtangan, pinaagi sa subpoena power sa Kongreso (Kamara ug Senado), gipahayag ni Rep. Chua nga adunay katungod gihapon ang komite sa pagkuha sa income tax return bisan pa adunay balaod nga nag-restrict sa pagpagawas niini.
Kahinumduman nga nagkauyon ang mga miyembro sa komite nga dili na ablihan ang green box aron malikayan ang posibleng legal nga isyu ug aron dili na makahatag og basehan ang kampo sa bise presidente sa pagkuwestyon sa hearing ug paghangyo og temporary restraining order (TRO) sa Korte Suprema.
