Gianunsyo na nga magapod-apod og cash relief assistance ang Land Transportation Franchising and Regulatory Board XI kauban ang Department of Social Welfare and Development XI alang sa mga public utility jeepney drivers sa Davao City sugod ugma, Abril 28 hangtod Abril 30.
Sumala sa lokal nga panggamhanan, mokabat sa 1,000 ka PUJ drivers ang makabenepisyo sa maong ayuda nga ipahigayon sa 3rd Floor Function Hall sa Agdao Public Market Farmers Building gikan alas-8 sa buntag hangtod alas-4 sa hapon.Subay sa iskedyul, bahinon sa duha ka batch ang mga benepisyaryo matag adlaw, diin 500 ang pagaserbisyohan sa buntag ug laing 500 usab sa hapon aron masiguro ang organisado nga payout process.
Lakip sa mga kinahanglan dad-on sa mga benepisyaryo ang ilang professional driver’s license ug photocopy niini nga adunay tulo ka pirma.Dugang pa niini, hugot nga gipanawagan sa mga otoridad nga angayan lamang motambong ang mga driver nga nakadawat og opisyal nga text message gikan sa CSWDO aron malikayan ang pagsamok, sobra nga panagtapok, ug aron mapadayon ang hapsay nga distribusyon sa cash assistance.
