Nagduso na og reklamo si Atty. Manases Reyes Carpio, bana ni Vice President Sara Duterte, sa Quezon City Prosecutor’s Office batok sa mga opisyal sa Bangko Sentral ng Pilipinas (BSP), Anti-Money Laundering Council (AMLC), ug pipila ka representante sa House of Representatives.
Lakip sa mga giingong giapil sa reklamo sila BSP Governor Eli Remolona Jr., AMLC Executive Director Ronel Buenaventura, ug mga miyembro sa House Justice Committee nga sila Reps. Gerville Luistro, Percival Cendaña, Chel Diokno, ug Leila De Lima. Sumala sa kampo ni Carpio, ang reklamo may kalabotan sa giingong paglapas sa Anti-Money Laundering Act, Bank Secrecy Law, ug Data Privacy Act.
Gibutyag niini nga iligal nga gipadayag ang “classified confidential banking records” nga protektado sa balaod.
Gikanayon usab sa iyang bahin nga nawad-an kini og kahigayonan sa legal nga depensa alang sa iyang kaugalingon, pamilya, ug sa banking community.
Gibutyag usab sa iyang abogado nga ang reklamo dili batok sa kamatuoran sa mga “suspicious transactions” nga gipadayag sa House Justice Committee, kondili nakatutok lang sa giingong paglapas sa balaod sa pag-leak sa impormasyon.
Sa maong pagdungog, gi-report sa AMLC nga adunay kapin P6 bilyon nga transaksyon nga konektado kang Carpio ug sa Bise Presidente, lakip ang P4.525 bilyon nga misulod sa ilang accounts, P1.554 bilyon nga migawas, ug P791 milyong dili matino kung inflow o outflow.
Gitawag ni Carpio ang maong pagbulgar nga “black propaganda” ug “political harassment” nga giingong gitumong sa pagpangdaot sa reputasyon sa Duterte family.
Dugang pa sa iyang legal counsel, si Carpio usa ka pribadong indibidwal ug dili kabahin sa impeachment proceedings.
