Gipahayag sa Armed Forces of the Philippines (AFP) nga dili inosenteng sibilyan ang usa ka University of the Philippines (UP) student leader nga namatay sa engkwentro sa Negros Occidental niadtong Abril 19, diin 19 ka giingong miyembro sa New People’s Army (NPA) ang napatay usab.
Sumala kang AFP Chief Gen. Romeo Brawner Jr., si Alyssa Alano, usa ka UP Diliman student council education and research councilor, nakaplagan nga armado ug nagsul-ob og combat gear taliwala sa nahitabong engkwentro sa Toboso tali sa Philippine Army ug sa giingong mga miyembro sa NPA.
Nagsugod ang engkwentro sa Barangay Salamanca, diin sumala sa militar, milungtad og pipila ka oras ang sinukli-ay og bala sa wala pa miatras ang mga rebelde. Narekober sa mga sundalo ang mga patay nga lawas, high-powered firearms, ug mga dokumento nga ilahang gihulagway isip “subversive.”
Adunay lima ka giingong rebelde nga nadakpan usab sa follow-up operations. Tungod niini, gikumpara usab ni Brawner ang insidente sa nahitabo sa Occidental Mindoro, diin usa ka Filipino-American activist ang naluwas nga buhi human wala kuno mitubag sa armadong pakig-away sa mga sundalo ug sa ulahi gibalik sa iyang pamilya.
Gibutyag pag-usab sa AFP nga nagsunod lamang sila sa tawhanong katungod kon human rights ug naggamit lamang og pwersa kung gikinahanglan batok sa armadong grupo.
