Gikasuhan na ang pito ka mga kadete sa Philippine National Police Academy nga nalambigit sa giingong bayolenteng hazing nga migamit og muriatic acid batok sa kapin 20 ka plebes sa Silang, Cavite.
Sumala sa Police Regional Office 4-A, giatubang sa lima ka 3rd Class Cadets ug duha ka 2nd Class Cadets ang paglapas sa Republic Act No. 11053.
Apil usab sa gikasuhan ang usa ka Tactical Officer nga may ranggong Police Major ug usa ka Tactical Police Non-Commissioned Officer nga Police Senior Master Sergeant tungod sa giingong kapakyasan sa pagbantay ug pagpatuman sa disiplina.
Gisumite ang kaso sa Philippine National Police Criminal Investigation and Detection Group sa piskalya sa Imus City.
Sa imbestigasyon, nadiskobre nga nahitabo ang insidente niadtong Abril 3 sulod sa PNPA barracks sa Silang.
Tulo ka kadete ang giingong direktang mibubo og muriatic acid sa mga estudyanteng kadete, nga nakaangkon og grabeng paso sa ilang likod ug sensitibong bahin sa lawas.
Nadakpan usab ang tulo ka kadete sa follow-up operations.
