Gikabutyag nga gihatagan og clearance sa House of Representatives si Leyte 1st District Rep. Martin Romualdez aron mobyahe paingon sa Singapore, sumala sa iyang abogado.
Kini supak sa unang pahayag sa Office of the Ombudsman nga wala niini aprubahi ang travel request ni Romualdez.
Gipasabot ni Ombudsman Jesus Crispin Remulla nga si Romualdez anaa ubos sa Immigration Lookout Bulletin Order samtang nagpadayon ang imbestigasyon kalabot sa giingong flood control scandal, busa wala nila girekomenda ang iyang paggawas sa nasud ug giingon nga mas maayong dinhi na lang siya sa Pilipinas magpatambal.
Apan, gipaklaro sa abogado ni Romualdez nga si Atty. Ade Fajardo nga dili kini travel ban, kundili simpleng koordinasyon lamang sa immigration, ug iyang gibutyag nga nahatagan na og travel authority ang magbabalaod.
Sa usa ka video, mibutyag si Romualdez nga mobyahe siya sa Singapore gikan Abril 20 hangtod Mayo 4 alang sa follow-up checkup human sa iyang angioplasty ug mipasalig nga mobalik siya sa nasud ug magpabiling available sa iyang mga katungdanan sa Kongreso.
Samtang, nangayo ang Office of the Ombudsman og precautionary hold departure order batok kaniya kalabot sa giingong ₱56-bilyon nga flood control kickback scheme, diin gitumong niini nga adunay dako nga posibilidad nga mobiya ug posibleng nalambigit base sa testimonya ug affidavit sa pipila ka personalidad sama ni kanhi Cong. Elizaldy Co ug mga testigo sa Senate Blue Ribbon Committee.
