Midaghan pa ang mga petisyon nga gisang-at sa Korte Suprema aron kwestyunon ang impeachment proceedings batok kang Vice President Sara Duterte sa House of Representatives.
Kini na ang ika-upat nga petisyon kalabot sa maong proseso.
Ang unang tulo gisang-at ni VP Sara mismo, grupo sa mga abogado, ug lain pang grupo nga adunay mga abogado ug pribadong katawhan.
Sa 34-panid nga petisyon nila Hue Jyro Go, Micah De Guzman, ug Jake Leoncini, gihangyo nila ang Temporary Restraining Order (TRO) o injunction aron mapahunong ang paghisgot sa ika-3 ug ika-4 nga impeachment complaints, lakip ang pag-isyu og subpoena.
Giingon sa mga petitioner nga ilegal ang sunod-sunod nga subpoena ug pangolekta og ebidensya nga wala sa reklamo, nga ilang gitawag og “fishing expedition,” ug paglapas sa Konstitusyon ug Impeachment Rules.
Gikuwestiyon usab nila ang pagpaningil og SALN nga wala kunoy direktang kalambigitan sa mga alegasyon.
Sumala pa nila, adunay kakulangan sa “fair play” tungod sa giingong bias sa pipila ka magbabalaod, nga mahimong grave abuse of discretion.
Gimandoan na sa Korte Suprema ang Kamara ug House Committee on Justice nga mosumite og komento.
