Gihangyo ni House Deputy Speaker Paolo Ortega V si Bise Presidente Sara Duterte nga motambong sa impeachment hearing karong abril 22 ug manumpa aron direktang matubag ang mga alegasyon batok kaniya.
Sumala pa ni Ortega, mas angay ug mas importante nga madungog sa publiko ang testimonya sa bise presidente ubos sa panumpa, imbes nga dili motambong sa pagdungog ug magbase lang sa mga pahayag pinaagi sa media aron ipasupak ang mga akusasyon, ilabina kadtong giingong gibutyag sa giingong “bagman” nga si Ramil madriaga.
Lakip sa kaso nga giatubang ni VP Duterte, ang impeachment naay kalabotan sa giingong dili hustong paggamit sa P612.5 milyon nga confidential funds sa office of the Vice President ug Department of Education, ug usab sa isyu sa giingong dili motugma nga kabtangan kumpara sa iyang gi-deklarang kita.
Dugang pa ni ortega, kung tinuod nga gusto ipasabot sa bise presidente nga sayop ang mga pasangil, kinahanglan kini motubag sa komite, manumpa ug moatubang sa opisyal nga proseso sa imbestigasyon.
Sa kasamtangan, gilauman nga hisgutan sa house committee on justice ang mga financial records ni vp duterte, lakip na ang iyang statement of Assets, Liabilities and Net Worth (SALN) ug tax documents.
